Tær nógvu smáu rørslurnar í gerandisdegnum telja eisini við í kaloriuroknskapinum. Hesar rørslur koma undir heitið NEAT (non-excercise activity thermogenesis (brenning)). NEAT er alt tað, tú gert, tá tú ikki íðkar ella svevur. Tað kann t.d. vera at tosa, vaska upp, ganga ein túr við hundinum ella rudda. Men eisini minni tilvitaðar rørslur, so sum at trumma við fingrunum, vippa við tærnum ella nikka í takt við tónleikinum, sum tú lurtar eftir.

NEAT-rørslur kunnu vera góðar fyri heilsuna
Hóast hesar smáu rørslurnar ikki styrkja blóðrenslið ella geva tað sama, sum tá tú fært pulsin upp nakrar ferðir um vikuna, so skulu vit ikki undirmeta tær. Ert tú ein av teimum, ið gert nógvar tílíkar NEAT røslur um dagarnar, kann tað ávirka blóðtrýst, kolestorol og insulin-kenslusemi – og hetta kann aftur fyribyrgja æðrakálking, hjarta/æðrasjúkum og diabetes-2.

Tey vimsutu kunnu spara 1-2 kg um árið
Í roynd og veru kunnu fólk, sum eru eitt sindur órólig og vimsut, brenna tað dupulta av tí, sum fólk, ið fyri tað mesta halda seg í friði. Hetta kann aftur hava ávirkan á, um tú tekur 1-2 kilo uppá um árið. Tí skalt tú ikki harmast um at hava ilt við at sita í friði – tað er bara gott fyri brenningina og heilsuna sum heild.

Soleiðis fært ú meira NEAT inn í gerandisdagin
Her eru nøkur prei til, hvussu tú kanst brúka meira orku og økja um brenningina í gerandisdegnum. Rør teg og brúka kroppin meira um dagarnar – og minst til, at alt telur við!

1. Tak altíð trappurnar heldur enn lyftuna – bæði upp og niður
2. Statt, tá tú kanst. T.d., tá tú bíðar eftir bussinum, í bíðirúminum hjá tannlæknanum ella tá tú kannar teldupostar.
3. Far ein lítlan gongutúr í døgurðatímanum, eftir nátturða ella áðrenn songartíð – 10 minuttir gera mun!
4. Lat bilin standa og súkkla ella gakk til arbeiðis ella til handils. Fert tú í bili, so parkera longst burturfrá og gakk seinasta strekkið.
5. Í staðin fyri at hittast á kafé, so kunnu tú og vinkonan ganga ein túr við hvør sínum kaffi-to-go.
6. Gakk, tá ið tú kanst. Kanska til næsta buss-steðgipláss í staðin fyri at standa og bíða – ella far úr bussinum fyrr og gakk restina.
7. Rør teg í steðginum – bæði heima og til arbeiðis. Reis teg upp, strekk teg, vippa tærnar, sveiggja við ørmunum og rør kroppin mest møguligt – og minst tríggjar ferðir um tíman.
8. Gakk runt, ger squats ella statt á einum beini, meðan tú bustar tenn ella tosar í telefon.
9. Drekk nógv vatn. Soleiðis fært tú bæði rørt teg, tá tú fert eftir vatni, og tá tú skalt á ves. Og samstundis sløkkir tú tostan.
10. Legg tíni ting eitt sindur burturfrá, soleiðis at tú mást ganga longri til t.d. printara, kaffimaskinu ella fjarstýring.

Kelda: alt.dk.