1. Tað er lætt
Hetta er helst størsti fyrimunurin, tí jú lættari venjingin er, tess størri eru sannlíkindini fyri, at tú fert avstað. Øll kunnu vera við, gongutúrar krevja hvørki góðan grundform, vegleiðing, smørt klæði ella umklæðing. Tú kanst ganga hvar sum helst og nær sum helst – eisini tá tú ert og ferðast.

2. Tað kostar einki
Hetta er nakað, sum teimum flestu dámar. Tær tørvar einar góðar gonguskógvar, men annars eru ongar útreiðslur til útgerð, limagjald ella flutning. Tú bindur lissurnar, letur hurðina upp – og fert til gongu.

3. Tað er ikki hart fyri kroppin
Tá tú gongur, hevur tú alla tíðina annan fótin á jørðini. Tí er tað ikki so hart fyri lið og sinur, sum tá tú til dømis rennur, og tí fært tú sjáldan skaðar av at ganga túr.
Vigar tú ov nógv, so er serliga gott at ganga, heldur enn at renna, tí eyka kiloini eru ring fyri liðir, sinur og knø.

4. Tað styrkir beinagrindina
Smáu stoytirnir upp gjøgnum kroppin, sum koma, hvørja ferð, tú setur fótin í, styrkja beinagrindina. Tí er betri at fyribyrgja t.d. beinbroyskni við at ganga heldur enn at t.d. súkkla.
Jú skjótari, tú gongur, tess harðligari setur tú fótin í undirlagið, og tess størri stoytur fer upp ígjøgnum kroppin. Tað sama ger seg galdandi, tá tú gongur á ójøvnum undirlagi – serliga í undanbrekku.

5. Gott fyri blóðrenslið
Regluligir gongutúrar stimbra hjarta og blóðrensl, so bæði blóðtrýst og kolesteroltøl fella. Skjótari tú gongur og hægri pulsurin er, betri er. So gakk skjótt og sveiggja í takt við ørmunum.

6. Tú fært betri konditión
Vilt tú hava betri konditión, so skal ferð á. Eitt tað besta amboðið til betri konditión, er intervallgongd, tá tú skiftir ímillum at ganga við vanligari ferð og at ganga skjótt. Gakk helur við fleiri fetum um minuttin enn at gleiva avstað.

Og eitt lítið prei: Verður tú ikki pøst, so gongur tú ov seint!

3 x munagóð intervallvenjing
Her eru tríggir ymiskir hættir, sum tú kanst royna, fyri at geva konditiónini eitt spark.

1. Gakk 1 km róliga.
2. Gakk síðani so skjótt sum gjørligt í 2 min
3. Gakk vanligt í 2 min.
4. Endurtak nr. 2 og 3 fýra ferðir afturat
5. Gakk 1 km róliga.

Brekkuvenjing
Finn tær eitt stað við nógvum brekkum (ella einari). Gakk mótbrekkurnar so skjótt sum gjørligt og gakk við vanligari ferð oman aftur. Gakk 3-5 km á henda hátt.

Pýramidu-intervall
Hita upp við at ganga 1 km róliga. Gakk so intervall eftir pyramidu-modellinum, har intervall og steðgur eru eins long. Byrja við at ganga 30 sekund skjótt og 30 sekund spakuligt, síðani 1 minutt skjótt og 1 minutt spakuligt – hald fram, til tú ert komin til 2,5 min. Bakka so aftur á sama hátt.

Situr tú har enn? Far út og gakk tær ein túr! ;-)

Kelda: iform.dk