Í klædnaskápinum hjá Birnu Vatnhamar í Leirvík finnur tú øðrvísi snið og litir. Hon elskar alt frá G&G, buksudraktir, smúkkur og tilhoyr, men hon fer helst ikki í stilettir, tí tað er umráðandi, at hon følir seg væl til passar í tí, hon er í. Og so er hon so góð við síni pløgg, at hon ongantíð turkar nakað í turkitrumluni.
Fakta
Birna Vatnhamar sum námsfrøðingur í vøggustovu og býr í Leirvík saman við manni sínum, Sølva, og børnunum, Davidi, Bergi og Karini.
Stílurin hjá mær er ... ógvuliga skiftandi. Eg veit ikki, um eg bara havi ein stíl! Eg eri tann typan, sum kann fara í nógv ymisk klæðir. Mær dámar væl avslappandi klæðir, sum ikki sita ov tætt, joggingklæðir, síðar frakkar og einar góðar skógvar.
Litir eru ... ofta tengdir at veðrinum. Eg eri ikki typan, sum eri til ein lit, tá tað kemur til klæðir. Eg fái tó ofta at vita, at grønt riggar best til mín, tí eg havi so grøn eygu. Men fyri meg hevur veðrið nógv at siga. Um veturin eri eg nokk mest í jarðlitum. Og so skjótt summarið kemur, elski eg at fara í klæðir við pastell-litum.
Eg hevði ongantíð farið í ... tú skalt jú ongantíð siga ongantíð, men neon-litir er altso ikki akkurát eg. Og eg geri alt tað, eg kann fyri at sleppa undan at fara í stiletter. Tá eg bleiv gift, fór eg í stiletter, men so skjótt vit komu úr kirkjuni, fór eg í einar sneakers og var í teimum alt kvøldið.
Birna um ...
Smúkkur ...
Eg elski smúkkur! Bæði gull og silvur. Sum áður nevnt, so eri eg sera góð við míni ting. Eg eigi nógvar smúkkur, sum hava nógv at siga fyri meg. Bæði við søgu og fortíð. Eg var abbasa genta og havi arvað hansara giftiring. Hann havi eg ætlanir um at smelta um til eina smúkku til mín. Eisini eigi eg ein grønlendskan thulemand. Eg var so heppin at kunna keypa hann á rótikassanum frá einari fittari konu, sum spurdi meg persónliga, um eg vildi keypa hann. Hann eri eg sera glað fyri, tí hann minnir meg um ommu mína, sum eisini átti ein.
Mamma mín hevur eisini givið mær ymiskar smúkkur. Eitt nú ein gullring, sum hon fekk í konfirmatiónsgávu. Og maður mín hevur keypt mær ymiskar smúkkur gjøgnum árini.
Tilhoyr ...
Eg haldi, at tað piftar eitt sett upp, um tú fert í ymiskar smúkkur til. Eg brúki altíð mítt Michael Kors ur, tvær gull-hálsketur og mín gifti- og forlovilsisring. Havi eisini altíð oyrnalokkar í oyrunum. Eg skifti ímillum silvur- og gull-oyrnaringar og -hálsketur, alt eftir hvørjum klæðum eg eri í. Eg havi sum oftast hárið í einum frísutum toppi/hala, men kann eisini brúka hárboylar. Eri ikki typan, sum brúkar tasku, men eg havi eina frá Hugo Boss, sum eg bert brúki, um eg skal okkurt serligt.
Kjólar ...
Eg vil heldur siga buksudrakt! Eg elski at fara í eina buksudrakt, og eg eigi bæði fínar og gerandisligar.
